அழும் குழந்தைச் சின்னமடி நீ எமக்கு..!

உனது அழுகைதான்
உனது நிலையாச்சு என்பது மட்டுமல்ல
உனைப்போன்ற அத்தனை மனிதரையும்
காக்கும் பொறுப்புகளை
அறுத்தெடுத்த பேய்களும்
பிசாசுகளுமான அரசும்
அதன் அடிவருடிகளையும் அழிக்கின்ற
குழந்தைகளின் போராட்டமடி உனது..!!

நீ உன்னால் முடிந்தவரை அழு..,
அழு.., அழு.., தொடர்ந்து அழு..,
அழுவதைத் தவிர்த்து
வேறொன்றும் பேசிப் பறைந்துவிடாதே மகளே..!
இதைவிட வேறொன்றும்
இல்லையடி உனக்கு..!?

நீ உனது தந்தைக்காக மட்டுமல்ல
எங்கள் தாய்நாட்டில்
உனைப் போன்ற சகோதரருக்காகவும்
அழுகின்ற குழந்தைச் சின்னமடி.

உனது தந்தையை
கடத்திய அம்மிக் கல்லுகள்
என்றோ ஒருநாள்
பெரும் சுனாமியுள் மாட்டும்வரை
நீயே எமக்கு
அழும் குழந்தைச் சின்னமடி.

உனது தந்தையைப் போல்..,
உனது நிலையான
இன்னும் பல்லாயிரம்
குழந்தைகளின் பெற்றோரை..?
இந்தப் பேய்களும் பிசாசுகளுமான
அரசும் அதன் அடிவருடிகளும்
பிடித்து அடைத்து வதைத்து..??
உனை என்றும் அழவைத்த
இலங்கை அரசியலில்
நீ என்றுமே
அழும் குழந்தைகளுக்கான சின்னமடி.

- 02/04/2012