தேசிய பிரச்சினைக்கு - தேசிய அரசால் தீர்வாம்!

ஆக யாரோ ஆட்டுவிக்க, ஆடுகின்ற பொம்மை ஆட்டம் பாராளுமன்ற மேடையிலேயே அரங்கேறுகின்றது. கை தட்டுக்களும் - ஆட்டம் பற்றியும், தர்க்கங்கள் - விவாதங்களுக்கு இடையில் மக்கள் கட்டியிருந்த கோமணங்களைக் கூட உருவுவது தெரியாது சொக்கித்துப் போய் நிற்கின்றனர்.

இலங்கை நவதாராள காலனியாக மாறி இருக்கும் சூழலில் - அதன் எஜமானர்கள் திட்டங்களே அரங்குக்கு வருகின்றது. இந்தத் திட்டங்களை முன்னெடுக்கும் பராளுமன்ற பொம்மைகளின் திறமை பற்றியும் - ராஜதந்திரம் பற்றியும் "அறிவுத்தனமான" முட்டாள்தனங்களை முன்வைத்து அரசியல் பச்சோந்திகளாக மாறிவிடுகின்றனர்.

தன்னை மனிதனாக முதன்மைப்படுத்தி சிந்திக்காத இனவாத சிந்தனை முறையில் இருந்து இதன் பாதகம் - சாதகம் குறித்த ஆரூடங்களும் - மகிழ்ச்சிகளும் - அவநம்பிக்கைகளுக்கும் அளவு கிடையாது. இதுவே அனைவரினதும் அரசியலாகிவிடுகின்ற சமூக அவலம்.

இன்று முழுப் பாராளுமன்றமுமே அரசாக மாறி இருக்கின்ற நிலையில் - நாட்டின் அனைத்துப் பிரச்சனையும் தீர்க்கப்பட்டு விடும் என்று நம்புவதும் - எதிர்பார்ப்பதுமானது அப்பாவித்தனமானது. இல்லை தீர்க்கப்பட்டு விடும் என்று கூறுவது, மோசடித்தனமாகும்.

அதாவது இது வரை காலமும் அரசுக்கு எதிராக எதிர்க்கட்சிகள் இருந்ததாலேயே நாட்டில் பிரச்சனைகள் தீர்க்கப்படவில்லை என்றும் - பிரச்சனைகள் உருவானதாக நம்புகின்ற - கருதுகின்ற பகுத்தறிவற்ற சிந்தனை முறையாகும். சர்வாதிகாரம் மூலம் நாட்டின் பிரச்சனை தீர்க்க முடியுமென்ற புலியிசவாதம் கூட. புலிகள் "தமிழீழத்தைப்" பெற கையாண்ட அதே "தமிழ் தேசிய" சர்வாதிகாரம் - தேசிய அரசு என்ற சர்வாதிகாரம். மக்கள் நலன் சார்ந்து ஒன்றாக சிந்தித்து உருவான மக்கள் அரசு அல்ல, நவதாராளவாத சுரண்டல் அரசு. அதாவது மக்களையும் - தேசத்தையும் அன்னியனுக்காக சுரண்டும் அரசு.

இதன் பின்னுள்ள உண்மைகள் என்ன? நவதாராளமய காலனியாக்கமே, நாட்டின் தேசிய தன்மையையும் - சமூக ஒருமைப்பாட்டையும் அழித்து அதனிடத்தில் முரண்பாடுகளைத் தோற்றுவிக்கின்றது. சுரண்டல் முறை தான், சமூகங்களையும் - வர்க்கங்ளையும் ஒடுக்குகின்ற கருவியாக இருக்கின்றது. இது தான் தேசத்தின் அனைத்து பிரச்சனைகளினதும் - முரண்பாடுகளினதும் தோற்றுவாய்.

சுரண்டல் முறை - தனிச்சொத்துடமை அமைப்பு இருக்கும் வரை, எந்தப் பிரச்சனையும் முரணற்ற ஜனநாயக முறையில் தீர்க்கப்படமாட்டாது - தீர்க்க முடியாது. சுரண்டல் தேவைக்கு ஏற்ப முரணான ஜனநாயகத் தீர்வுகளும் - ஒடுக்குமுறையுமே நடைமுறையில் இருக்கும். இதை மீறி எதுவும் நடக்காது.

சுமந்திரன் - ரணில் கூறுவதும் இதைத்தான் - கோருவதும் இதைத்தான். மக்களை ஏமாற்றி சுரண்டவும் - அடக்கவும், நவதாராளவாத ஆளும் வர்க்கத்துடன் கூட்டமைத்துள்ள ஆட்சியாளர்கள், இன்று ஒன்றாக களமிறங்கி இருப்பதையே அண்மைய பாராளுமன்ற கூத்துகளும் - சதிகளும் வெளிச்சத்துக்கு கொண்டு வருகின்றது.

இனத்தினதும் - இனவாததின் பெயரால் ஆட்சிக்கு வந்தவர்கள் - அதை தங்களே கூடித் தீர்க்கப் போவதாக கூறுவது வேடிகையான நகைச்சுவை. இன்று உலகில் அமைதியையும் - சமாதனத்தையும் பாதுக்காகவும் அதைக் கொண்டு வரவுமே ஆயுதங்களை குவித்து - ஆக்கிரமிப்புகளையும் நடத்துவதாக கூறுகின்ற அமெரிக்கவின் உலக மேலாதிக்க "ஜனநாயக" கூற்றுக்கு ஒப்பானதே, சுமந்திரன் - ரணில் தேசிய பிரச்சனைக்கு தீர்வு தொடர்பாக முன்வைக்கின்ற கூற்றுக்கள்.

பாராளுமன்றம் சுரண்டும் வர்க்கதின் சாக்கடை என்பது - உலகில் வாழும் மக்களுக்கு முரணற்ற ஜனநாயகத்தை வழங்கியது கிடையாது என்பதுமே, உலகறிந்த பொது உண்மையாகும்.